Prishtina do të udhëtojë pa tre lojtarë standard, zëvendëskapitenin, Bardhyl Kaçiu dhe dy mesfushorët, Azem Ahmeti dhe Isuf Llumnica, që të tre të lënduar në ndeshjen në Mitrovicë kundër Trepçës ‘89. Ndërsa në përbërjen udhëtuese do të kthehen sulmuesi, Enis Fetahu dhe mesfushori i krahut të majtë, Yll Hoxha.

Afrim Tovërlani kryetrajner i Prishtinës thotë se pret ndeshje të fortë sidomos duke e pasur parasysh terrenin e vështirë në atë fushë fortë. "Ne në të gjitha ndeshjet shkojmë për fitore, por them se le të fitojë më i miri. Nuk do të taktizojmë pa marrë parasysh se pastaj na pret derbi me Vëllaznimin. Edhe se i kemi këto tri mungesa nuk do të rrezikoja në asnjë mënyrë t'i fus në lojë. Ndoshta do t'i aktivizoj pak të mërkurën në ndeshjen për kupë që të jenë plotësisht të gatshëm për ndeshjen me Vëllaznimin" - shprehet kryetrajneri Tovërlani. Ndersa mbrojtësi Mervan Hoxha deklaron se ashtu sikur në të gjitha ndeshjet, edhe në Gjilan do të udhëtojnë për t'i rrëmbyer tri pikë. "Në rast të fitores me siguri se pastaj ndeshjen derbi me Vëllaznimin do ta prisnim shumë më të qetë dhe të relaksuar. Me gjithë fushën e vështirë për lojë, unë pres që ne ta zhvillojmë lojën tonë brenda këtyre mundësive dhe në Prishtinë të kthehemi me gjah të plotë" - përfundoi Mervan Hoxha.

ASNJË FITORE E PRISHTINËS NË GJILAN

Prishtina dhe Drita janë ndër dy skuadrat që pas luftës kanë tituj kampioni të fituar. Në atë rrugë drejt titullit, këto skuadra shpesh janë ndeshur dhe ndeshjet e ndërsjella kanë vendosur shumë për plasmanin përfundimtar në tabelën e klasifikimit. Nga gjashtë përballjet kur Drita ka qenë vendas, Prishtina ka fituar vetëm një takim që ishte zhvilluar në Mitrovicë, për shkak të suspendimit të terrenit të Gjilanit. Ndërsa nga pesë takimet tjera të zhvilluara në Gjilan, Drita ka të fituara 2 takime dhe 3 herë tjera ndeshja është mbyllur baras.
Prishtina nuk ka udhëtuar në Gjilan për t'u ndeshur me Dritën që nga pranvera e vitit 2004, kur Drita kishte shënuar fitore. Por në fund të kampionatit kishte rënë nga Liga për t'u kthyer sërish në kampionatin e sivjetmë.
Përveç rivalitetit të theksuar në fushë e përbashkëta tjetër e këtyre dy skuadrave është edhe paraqitja e disa lojtarëve për dy skuadrat. Zakonisht ka ndodhur që lojtarët nga Drita të transferohen në Prishtinë. Ndër ta më i suksesshmi ka qenë Xhevdet Llumnica, kurse nga Drita të transferuar në Prishtinë kanë qenë edhe Enver Prapashtica, Selman Berisha, Mensur Limani, Visar Sermaxhaj. Tani lojtari i vetëm që do të jetë në fushë e që ka luajtur për të dyja skuadrat është qendërmbrojtësi i Prishtinës, Mervan Hoxha. Nga Prishtina në Dritë ka shkuar vetëm Hysni Xhinovci dhe është rikthyer Sermaxhaj.

Ndeshjet e ndërsjella të zhvilluara pas luftës në Gjilan:

Pranverë, 2000: Drita – Prishtina 3:1
Vjeshtë, 2000: Drita – Prishtina 0:0
Pranverë, 2002, Mitrovicë: Drita – Prishtina 0:2
Pranverë, 2003: Drita – Prishtina 1:1
Vjeshtë, 2003: Drita – Prishtina 0:0
Vjeshtë, 2004: Drita – Prishtina 2:0